Monday, February 23, 2009

بتقوووول اييية ؟؟؟



  • تعلن هيئة الارصاد الجوية البتجانية ان الجو فى استراليا اليومان دول برد وعندنا حر واحتمال سقوط ثلوج فى اثيوبيا والجو ربيع فى روسيا واليونان طراوة والعظمى فى اسبانيا 52 والصغرى 40 !! واللى مش مصدق يسافر ويشوف

  • هنا القاهرة : أعلنت الحكومة المصرية ان أحتياطى القمح المتوفر يكفى لمدة 4 شهور كما أعلنت جامعة الدول المهلبية ان احتياطى الشجب والادانة يكفى لمدة 4 شهور ... بصرة


  • أكدت وزارة الكهرباء والشباب والرياضة ان انقطاع الكهرباء المستمر سببة الرئيسى الهجرة الموسمية لطائر البطريق فى القطب الشمالى الغربى

  • جتالى تطمنيت من مصادر مقربة ان نادى الزمالك ناوى والنية لله ان يرحم جمهورة ( اللى هو احنا ) من الضغط والقلب والسكر ( وممكن الدقيق والزيت لو فى ) وحرقة الدم ومرض متلازمة نقص المناعة الشهير بالايدز ويفوز بالدورى سنة 2016 ودة بس عشان خاطر ننوس عين جمهورة ... طبقا لأخر احصائية احنا يا 36 واحد يأما 42 مشجع فى أخر احصاء للامم المتحدة الافعونية

  • مجرد معلومة لله : اللى قال مكر مفر مقبل مدبر كجلمود صخر حطة السيل من عل ( بكسر اللام ) امرؤ القيس صحاب احدى المعلقات مش البتاع البرتقانى اللى اسمة ريكو

  • واضح ان المثل بتاع نفسى ثم نفسى ثم الاخرين قد مضى عهدة وجة النيولوك بتاعة ... نفسى ثم نفسى ثم نفسى وفى 60 داهية الاخرين

  • أغلب شعوبنا العربية المهلبية للاسف لاتدرك قيمة الوقت الا فى حالة واحدة فقط لما الفريق اللى بيشجعوة يكون خسران وباقى 3 او 4 دقايق وتلاقيهم كل 5 ثوانى بيبصوا فى الساعة زى ما يكونوا مستنين على نار اطلاق اول قمر صناعى عربى
  • يعلن المنخفض الجوى عن اعتذارة على التواجد فى مصر كما أشارت هيئة الارصاد الجوية والبترول فى نشرتها الجوية ودة بسبب ارتباطة بماتشات فى الدورى الارصادى المرتفع
ســــلامو عليكــــم

Sunday, February 22, 2009

أمــراة سرمديــة

انسج لكى من السحاب ثوبا باريسيا
فيصبح السحاب أغلى عملة فى بورصة الاوراق المالية
وأهديكى زهرة لتزين شعركى
فتحوز الزهرة لقب أجمل زهرة شرقية
وأحيطك بمشاعر حب دافئة مخملية
فيصنفون مشاعرى كأرقى معاطف جسدية
وأكتب لكى كلمات وكلمات وكلمات
فيسمون كلماتى أشهر المأثورات الانسانية
انت من تصنعين هذا الفرق فى كل شيئ
أنة انتى من تجعلين الحياة كأنها حياة من السعادة الأبدية

Tuesday, February 17, 2009

عـــلى صـــوتـــك




ولو فى يوم راح تنكسر .. لازم تقوم واقف كما .. النخل باصص للسما

عمرى ما هنسى يوم الاتنين !!

سمعت مرة بالصدفة وانا مسافر على الطريق الصحرواى من مدينة الاسكندرية الى مدينة القاهرة اغنية لمحمد عبد الوهاب اسمها "عمرى ما هنسى يوم الاتنين"وواضح من كلام الاغنية ان السبب فى انو مش هينسى يوم الاتنين انو هيقابل فية حبيبتة طبعا محمد عبد الوهاب لو كان لسة عايش لحد دلوقتى واتعرضت علية الاغنية كان ممكن ميغنيهاش ، اعتقد لعدة اسباب اولا شركات المحمول حلت مشكلة ان الواحد يشوف حبيبتة فى اي يوم الموضوع بقى "فيديو كول" بـ 75 قرش ويخلص ، يشوفها بقى يوم التلات ولا يوم الجمعة مش فارق ومش محتاج اغنية مخصوص لموضوع المقابلة دة ،وثانيا الواد الحبييب عشان يروح يقابل اللى بيحبها "لازم يحسبها صح عشان يعيشها صح" زى الحملة الاعلانية اللى مغرقة شوارع العاصمة بتاعت توفر نص فاتورة الكهربا بتاعت البيت وتدفع االمقدم بتاع عربية "هامر" على اساس ان الناس بتدفع فاتورة الكهربا فى الشهر 2 مليون جنية او 2 ونص مليون جنية فى الحدود دية ، المهم كنا بنقول اية ؟ اة الواد الحبيب لو راح دلوقتى يقابل حبيبتة هيضطر يا كبدى يطلع كوبرى 6 اكتوبر وما ادراك ما هو كوبرى 6 اكتوبر يعنى بالميت من ساعتين لتلاتة متشعلق فوق وقول ساعتين ياخد شاور ويلبس الحبل او اللى على الحبل وساعتين لحد ما يرسى على دبدوب حلو يعنى ميصحش الشملول يخش بايدة فاضية فكدة ان شاء الله ممكن يتقابلوا الساعة 2 او 3 الصبح على احسن تقدير ، ولو اتهبل فى سنانة وراح على طريق الاتوستراد هتلاقى البيت كلة والجيران والشارع والحى كلو بيدعلوا بس انو يرجع بالسلامة ، اصل الطريق دة مفاجئاتة كتير ، دة مش بعيد الدبدوب اللى الحبييب جايبة لحبيبتة يقوم من نفسة لابس الحزام لزوم الامان ،ولو قلنا لأ الحمد لله البنت اللى بيحبها مش ساكنة فى منطقة هيضطر يسوق فيها على كوبرى 6 اكتوبر او طريق الاوتوستراد برضو الحبييب هيحسبها مليون مرة قبل ما ياخد قرار انو يتنازل عن مكان عربيتة تحت العمارة اللى لو مشى منة ابقى قبلنى لو لقى مكان يركن فية قبل كاس العالم فى جنوب افريقيا 2010 ، ماهو لو راح يقابلها ورجع ملقاش مكان يركن فية قريب من البيت بمسافة 12 كيلو ( احتمالات الموضوع دة تتراوح بين 136الى 198% ) فعلا ساعتها مش هينسى يوم الاتنين ، دة مش بعيد ميقدرش ينسى بقيت ايام الاسبوع الشيئ الوحيد اللى ممكن ينساة فى الوقت دة هو حبيبتة اللى كانت ورا المأساة دى وطبعا هيقعد يبرطم ويدعى على البنت الغلبانة واليوم اللى قابلها فية وطبعا هيستعين بصديق وهياخد راى الجمهور االلى هيرفع ايدة زى مجلس الشعب ويقول "موافقة" ، دة مش بعيد الجيران والشارع كلو ينضم للمظاهرة دى ومتستغربش لو لقيت البية الوزير المحافظ متعاطف فى المحنة مع الواد فى وبيدعى معاهم ، والغلبانة ياعينى عمالة تشرق وممكن يجلها زغطة كمان ومش بعيد تجلها كرشة نفس وتقعد تدعى على يوم الاتنين هى كمان و اللى خلاها تشوف حبيبها فى اليوم الاسود اللى مخطط ببنى غامق وتموت موتة سينمائية وهى نايمة فى سريرها فى المستشفى والاهل والجيران حوليها وبيعيطوا وتقوم هى قايلة جملتها الماثورة بصوت متقطع " كان يوم الندامة" وتقوم راسها لفة يمين ويطلع السر الالهى ... وطبعا سعتها المفتش كرومبو وسحس المتخلف هيشتغلوا ويحللوا المقصود بكلمة "كان يوم الندامة"وتبقى حلقة والدراما تقلب "اس ام اس" وجوايز وتبقى مسخرة انسانية .... المهم الاغنية ظريفة وخفيفة والحمد لله ان محمد عبد الوهاب غناها قبل ما يعيش فى القرن الـ 21 لانة فى الغالب كان هيرفض يخوض التجربة ويغامر باسمة فى تجربة فاشلة بسبب البيئة والظروف والجوابات المحيطة بحايتنا المعاصرة ..
اقعــــدوا بالعافيــــة.. ســلام

Saturday, February 14, 2009

تخيــــــل !!!


  • تخيل واحد واقف طالع عينة لأ ومش بس عينة طالع حاجات كتير تانية فى طابور العيش قدام فرن مستنى 3 أرغفة الواحد بخمسة صاغ وعمال بيتزق ويزق زى ما يكون فى حرب مع قوات حلف الناتو فى افغانستان او تقولش بيخوض معركة مع التتار ... وتيجى سعادتك بكل هدوء اعصاب وفى محاولة للتهوين عنة وتفكرة بالوطنية على طريقة المغنية شرين وتقولوا " جربت تغنلها " ؟؟
تحذير : قد يذكر اسلاف اسلاف جدودك ببعض الصفات اللى مش ولا بد
  • تخيل نفسك نازل من ميكروباص بيشيل 12 راكب بس فعليا راكبة 36 راكب خبطت فى مذيعة من مرضعات قلاوون بتوع القناة الاولى والتانية وحظك الموكوس خلاها تسألك عن رأيك فى التقدم الاقتصادى والتنموى والسياحى ورأيك فى القرى السياحية الجديدة فى منطقة العين السخنة ؟؟

الرد المقترح منك : العين السخنة ... احححححح .... سخنة اووووى

  • حضرتك واقف على البحر فى اسكندرية وبتشاور لتاكسي ولما يوقف تبص للسواق بقمة الجدية وانت بتنهج وتقولة السيدة زينب ان شاء الله يا سطى ؟؟

  • قاعد انت وصحابك فى مطعم شيك جوة اوتيل الفورسيزون واول ما يجيى الويتر ويسالك عن الاوردر ترد علية وهو واقف ... ثوانى وتقوم باصص لصحابك وتقولهم فى نبرة قاطعة ... حد هياخد حاجة غير الحواوشى ؟؟؟ وتقوم باصص للويتر بقمة الجدية والاستعجال ... كدة يبقى خمسة حواوشى ... وقبل ما يفوق من صدمتة وحالة الذهول اللى ممكن توقع على دماغة عشان حظة المقندل واقعة فى ناس زيك وزى اصحابك يجوا يطيروا البرج اللى فاضل فى دماغة تقوم باصص تانى لصحابك وفى لهجة من نظام اقصروا واخلصوا ... حد عايز يشرب حاجة بالمرة ؟؟؟ يقوم يرد اتنين منهم لأ شكرا واتنين يردوا احنا هناخد "حمص الشام" تقوم انت باصص للويتر تانى وتقولة كدة يبقى اتنين "حمص الشام" وانا هاخد بليلة ... بس بسرعة عشان عايزين نمشى

Wednesday, February 11, 2009

جامعة الدول المهلبية


  • اعلنت جامعة الدول المهلبية عن نجاحها فى عقد صفقة تصدير شجب وتنديد وبيانات ختامية للأمم المتحدة واكدت انها فى اتجاهها لابرام صفقة تصل قيمتها 220 دولار لتصدير شحنة شجب وتنديد ( وش قفص ) للاتحاد الاوروبى

  • عقدت المجموعة المهلبية "لشئون الهجرة والانتاج السينمائى " مؤتمرها الشهرى امس بجامعة الدول المهلبية حيث اكدت فية على الثوابت والمتحركات الدولية وتأثيرها على انخفاض الرقعة الزراعية بالدول المهلبية والتنقيب عن الدهب بتاع عم دهب واصدرت بيان يؤكد على حتمية نشر الدراسة لتكون متاحة لكل مواطن ليستفيد منها

  • اعلن مصدر مسئول بلجنة " الشئون البترولية والتعليم العالى والواطى " برفع سقف اسعار تصدير البترول والغاز وانابيب البوتجاز حيث اكد المصدر ان الفكرة جات لرئيس اللجنة اثناء قيامة برفع سقف بيتة وسعتها جتلو الفكرة المهلبية انو مادام سقف البيت ممكن يترفع يبقى ممكن يرفع سقف اسعار البترول واهو كلو برتقان برضو

  • عقدت ندوة بجامعة الدول المهلبية عنوانها " التصحر والتزرع ومصلحة المواطن" والتى اكدت فية جامعة الدول المهلبية ان التصحر او التزرع ( عكس التصحر طبقا لبيان الدول المهلبية ) مش مهم ... و حتى خرج رئيس الندوة وقال من الاخر كدة انا ميفرقش معايا تبقى صفرة ولا خضرة المهم ان المواطن يستمتع بالمهلبية حتى اخر نفس

  • اكد مسئول هام بجامعة الدول المهلبية عن رفضة التام اقتراح بعض المواطنين بتغير اسم جامعة الدول المهلبية الى حضانة الدول المهلبية واكد ان اسباب رفضة ان حضانة جاية من حضن ولو الجامعة حضنت المواطنين ممكن تبقى قضية تحرش جنسى واحنا مش فاضيين للكلام دة لاننا مشغولين بانتاج اول "تنديد" ديجيتال هيكون مفاجئة الجامعة فى المؤتمر القادم

  • اكد رئيس المجموعة المهلبية " للصناعة والارصاد الجوية وساعات الثروة البقرية " عن نجاح المجموعة فى انتاج اول شجب 4 سلندر بزجاج ملون وفتحة شجب ممكن تفتح من جوة والمواطن قاعد جوة عربيتة ، وقال رئيس المجموعة ان بكرة المواطن يدخل محطة الشجب يطلب 20 لتر شجب ويدوس على زرار فتحة الشجب وهو قاعد مرتاح وبيضرب مهلبية واكد سيادتة ان المجموعة بصدد الاعلان عن مفاجئة اخرى بانها تكاد تنتهى من انتاج "الادانة" الفول اتوماتيك قريباااااااا جدا

Saturday, February 7, 2009

كلمات القلب لأحسن ناس

لصحاب عربيات الفول اللى واقفين من بعد الفجر عشان يأكلوا الموظفين قبل ما يروحوا شغلهم ... لعمال النظافة اللى بيكنسوا الشوارع واللى يزعل اننا بنوسخها تانى والاجمل انهم مش بيزعلوا مننا ... للموظفين اللى الحياة ماشية معهم عكس الطريق ومع ذلك عندهم امل ان الحال يتصلح فى يوم من الايام ... للى بيحلموا احلام بسيطة ممكن يكون اكبرها ان ولادهم يكملوا تعليم عشان لسة مؤمنين ان الشهادة ممكن تسندهم فى مشوار الحياة الصعب ... لبايعين الجرايد اللى واقفين فى عز البرد عشان نعرف الدنيا بيحصل فيها اية ... لعسكرى المرور الغلبان اللى واقف تحت الشمس من الصبح لبليل على شوية مية وسندوتش فول ولسة فية حيل يضحك لما تهزر معة ... للخبازين والفلاحين اللى بيشقوا عشان احنا ناكل ونعيش ومع ذلك مش زعلانيين ولا غشاشين ... للى بيأوح فى الدنيا كل ما توقعة عشان يعيش ... للجيران الطيبين اللى لما بيعملوا اكل لازم يبعتوة لجيرانهم طبق ما هو النبى وصى على سابع جار ... للشباب الجدعان اللى بيأخد بأيد العجوز والضرير لما بيلقية عايز يعدى الطريق ... للشابات الحنينين اللى شايلين فى شنطهم بونبونى عشان لما يقابلوا عيال صغيرين ...للأطفال الصغيرين اللى لما بيتفرجوا على المسلسلات التاريخية ويسمعوا حد من الممثلين بيزعق ويقول "مولاى الخليفة ... رسول ملك التتار كتبغا " بيقولوا علية الصلاة والسلام لانهم لسة مش فاهمين ...ولما تقولهم اعمل كدة عشان ربنا يحبك يسالك فى براءة هو ربنا عايش فين ؟ لكل الناس الطيبين اللى عايشين حولين خط الفقر مش مهم فين ... ممكن فوقة وممكن تحتة وممكن جنبة بس لسة بيضحكوا وحمدين ربنا على الستر والصحة ... لكل دول وناس كتير كويسين وحلوين بقولهم انتم شرفتونا وكل الكلام الجميل قليل عليكم لانكم انتو جزء جميل فى يومنا وحياتنا وبلدنا ... لكم فائق احترامى واعتزازى

Tuesday, February 3, 2009

مــــن غـــــزة



يبرع الجيش الاسرائيلى فى قتل الاطفال .. انهم حقا جيش اسطورى لا يقهر !!!
  • رسالة الى أسرائيل : نحن شعوب قد تقتل وقد نجرح وقد يسقط منا ملايين الشهداء ولكننا لا نباد
  • التعبان الاسرائيلى يجيد فنون التلون السياسى طبقا للاتجاهات العالمية فى الثمانينات قال للعالم انو بيقتل الفلسطنيين وبيحتل أرضهم عشان يوقف المد الشيوعى السوفيتى فى المنطقة ولما حصل موضوع برجين التجارة برر قتلة للفلسطنيين واحتلال ارضهم انو بيوقف المد الارهابى فى المنطقة وبيمنع تغلل تنظيم القاعدة ، وفى الحرب على غزة فلقوا دماغنا انهم بيقتلوا الفلسطنيين وبيحتلوا ارضهم عشان يوقفوا المد الايرانى برضو للمنطقة ، طبعا انا مش هستغرب لو كان مبرر البعدة للحرب القادمة حماية العالم من المد الفنزويلى للمنطقة
  • بصراحة بعد تصريح المخفى على عينة يوفال ديكسين رئيس المخابرات الداخلية الاسرائيلية "الشين بيت"وهو متأنعر اووى وبيقول ستسقط غزة بعد 36 ساعة من بداية الحرب عليها ... فصمدت غزة وسقط رئيس المخابرات ، انا مستعد اعمل معة واجب واجبلة شغل فى الفرن اللى ورا بيتنا يجى يقرص عجينة العيش ويسيبوا من شغل المخابرات دة ، انت موهبك اكبر من كدة ، ولا اقولك خليك هناك مش عايزين قرف بس برضو هتقرص عجينة العيش
  • طبقا للأحصائات الفلسطينية اللى نقلتها الصحف الاسرائيلية ان المواليد خلال فترة الحرب على غزة كانوا فى حدود 3500 مولود مقابل 1500 شهيد فى نفس المدة ... راجع النقطة الاولى .. نحن لا نباد