Tuesday, March 31, 2009

عودة الكراصنة !!!

أعلنت الولايات المتحدة البرجوازية عن صعوبة السيطرة على الكراصنة ( اللى هما القراصنة ) الصوماليين لأنهم ولاد جنية وقد صرح ناطق عسكرى تخين المستوى ان القراصنة الله يحرقهم فى ليلتهم التركواز ، ولاد جنية من كذا ناحية لأنهم عندهم امكانيات فززززيعة ( اللى هى فظيعة ) بيستخدومها ... خد مثلا القوارب الخشبية السريعة اووى اووى ( واو اتين اووى ) اللى مش موجود زيها فى الولايات المتحدة البرجوازية لأ ومش بس قوارب سريعة لأ كمان عندهم لاسلكى( لأ بتهرجوا ) !!! وأكد سعادة الناطق تخين المستوى انو رغم الصعوبات اللى بتوجها الولايات المتحدة البرجوازية فى السيطرة على القراصنة ولاد الجنية رغم ضعف الامكانيات بتاعت الولايات المتحدة البرجوزية من حاملات طائرات ومدمرات وبوارج بحرية دة غير الاقمار الصناعية اللى عندها يا عينى على الكام وكالة استخبارات زى "السى اى اية " و"دى فى دى" و" دبليو سى"ومشاة البحرية والبرية ومشاة الطرق العادية الا ان ولاد الجنية مش بيابنو بالليل بالذات لان لونهم اسود دة غير حالة الرعب اللى بيسببو لجنود الولايات المتحدة البرجوازية لان القراصنة ولاد المفترية بيلبسو جلدة على عين واحدة ودة بيسبب حالة من الخوف لجنود البتاعة المتحدة البرجوازية وعشان كدة طالب الناطق تخين المستوى دعم حلف الناتو والدول الاوروبية ومنظمة التجارة العالمية والاتحاد الافرواسيوى ودول عدم الانحياز وبطاريق القطب الشمالى وشركة صيانكو لاصلاح العربات والدكو اللى ورا مصنع السكر اللى فى الحوامدية وانت مدى ضهرك للطريق ... وقال الناطق ان المفروض يدعموا الولايات المتحدة البرجوازية على الاقل بـ 2 مليون عسكرى او حتى 7 مليون عسكرى يدووووب عشان يقدروا يسيطروا على منطقة الكرن ( اللى هى القرن ) الافريقى ويرجعو السلام للمنطكة ( اللى هى برضو المنطقة ) زى ما نجحوا بالتلاتة قبل كدة فى العراق وافغانستان ولبنان كما طلب الناطق تخين المستوى الدول والشعوب العربية بدعم الولايات المتحدة البرجوازية فى حربها العادلة على القراصنة ولاد الجنية وانهم يدعو عليهم ولو ممكن يكنسو عليهم السيدة يبقى خير وبركة .. واهو كلو بثوبوا ... وختم الناطق تخين المستوى تصريحاتة للـ "بى بى من غير سى "ووجة رسالة شديدة اللهجة للكراصنة بعد ما كشف راسة وقال ... ربنا يهدكم يا بعدة يا وحشيييين هنرفع عليكم قضية خلع من المنطكة فى مجلس الامن
فيما رد قرصان بلاد بونت ( اللى هى الصومال ) على تصريحات الناطق التخين بتاع الولايات المتحدة البرجوازية ان اللى مربوهوش ابوة وامة القراصنة تربية .
سلامـــو عليكـــم

6 comments:

Anonymous said...

واو:)))حلوة جدا
على فكرة ما يحدث في الصومال ليس كرصنة اصدي ليس قرصنة لأن في اربع شروط حددها القانون الدولي لتعريف القرصنة الولايات المتحدة كالعادة فبركت شرط وركنت الثلاثة الثانيين على الرف جنب الافتر شيف، ناهيك بئى عن ان غالبا اللي بيكرصن هما شركات الأمن الخاصة او المرتزقة اللي حكومة بونت لاندعقدت معهم العديد من الاتفاقات، وهي شركات امن سبق اتهام بعضها بالتورط في جرائم قرصنة...يا ترى ليه؟ رغم ان بونت لاند من أكثر المناطق استقراراً وامناً في الصومال؟
امريكا هي الجهة المستفيدة مما يحدث هناك 100 سبب ابسطهم هو محاولتها السيطرة على جميع الممرات المائية الدولية فابلفعل تسيطر على قناة بنما وسيطرت على مضيق هرمز بعد غزو العراق ومضيق جبل طارق تحت سيطرتها بقبول المغرب استضافة الافريكوم، وحاليا تعمل لايجاد المبرر والمظلة الدولية للسيطرة على طريق التجارة الدولية عبر باب المندب في اتجاه قناة السويس وفي اتجاه ممر الكيب البحري، وديه خطوة على طريق السيطرة على جزيرة سوقطرة اليمنية بعد رفض اليمن عروض امريكية باستئجارها.
كما تحاول تشكيل تحالف دولي يمكنها من السيطرة على الصومال بعد هزيمة قوات التدخل العسكري وأمراء الحرب والقوات الاثيوبية أمام المحاكم الاسلامية...
ما يحدث في الصومال ليس قرصنة ولكنه شكل من اشكال ارهاب الدولة برعاية الولايات المتحدة.
والدليل على ما سبق أن القرصنة اللي بتيحصل بجد مش كده وكده في حوض دلتا النيجر بئالها سنين ومسمعناش جرايد بتلكم عنها ولا امم متحدة بتبطلها ولا حشود عسكرية ولا مجتمع دولي بيستغيث....ليه عشان مفيش هناك ممرات بحرية دولية هناك...

Salolo said...

شكرا على التعليق المفيد جدا والغزير بالمعلومات القيمة ... تحياتى واحترامى

To Visit My said...

your blog is very nice......

StreamedBeaver said...

Hey man, I can't even read the majority of the stuff on here, but I like the "Peace and Love" banner; good luck in life!

Salolo said...

StreamedBeaver thanks for your pass my friend & also for ur cute comment , have a nice day *smile*

Elvandro Burity said...

I can´t read the majority. But I like the way you put your blog.
I hope you have a nice day.
Fraternally,
Elvandro
PS.
visit us
http://elvandroburity.blogspot.com