Saturday, January 17, 2009

اعلام الانكسار

فى بعض وسائل الأعلام العربي عايشه حالة من الانفصال والانفصام عن الواقع في حالة الحرب على غزة وبتحاول تصدر لنا حالة من اليأس وثقافة الهزيمة والانكسار ...لصالح أية ؟؟ ولصالح مين ؟؟؟ اعتقد أن اللي في غزة دول مسلمين عرب ومسيحيين من أصول عربية ... يعنى زينا وبعدين تحس ساعات أن في حالة من الخطاب الموجة الخبيث بيحاول يوصلنا قال أية ؟ أن المقاومة السبب في قتل المدنيين !!!! اللي فاهم كدة غلطان واللي بيحاول يفهمنا كده بنقوله مش عايزين حد يضحك علينا ... في حرب تحرير الجزائر وقع مليون شهيد ومسمعناش أن حد قال أن المقاومة هى السبب و فى الثورة الفرنسية والإنجليزية محدش طلع علينا وقال ان التحرر ومقاومة الاحتلال كان السبب في قتل مدنيين فى الدول دي .... سؤال يا جماعة هو المطلوب ان المحتل ياخد وطنى وارضى وأشوفوا كل يوم بيموت اهلى وأنا ادخل علية ببوكية ورد ؟؟؟!! ولا المفروض أقول لأ انا هفضل محتل ومعنديش كرامة عشان المدنيين ميموتوش ؟؟؟!!! اللي بيقتل الفلسطينيين الاجتياح بتاع جيش إسرائيل واللى بيقصف المدنيين في غزة طائرات إسرائيل مش عايزين إسقاطات في غير محلها ... وعلى العموم ... أحب أقول لإعلام الانكسار إسرائيل هتاخد على قفاها فى الحرب دي زى برضو ما اخدت على قفاها من اول حرب أكتوبر 1973 ومرورا بحرب لبنان 2006 ( هما ابتدوا يدمنوا موضوع القفا دة وأحنا مش حنحرمهم منة ) جون ستيوارت الاذاعى الامريكى اللامع والمشهور وصاحب البرنامج الشهير فى امريكا Daily Show قال تعليقا على رد المقاومة على الهجوم الاسرائيلى " أنا أتفهم ما يشعر به الرجل عندما يضطر أن يعيش في مكان ضيق ولا يستطيع المشي ألا عبر المرور على العديد من نقاط التفتيش في كل مرة يحتاج أن يدخل فيها إلى الحمام " اهو الراجل اللي مش مننا نطق وتفهم وانتو نقولكم تور تقولننا احلبوه ... أقولكم كمان مفاجئة مش الراجل ده طلع يهودي ... فعيب اختشووووا .. ملحوظة قبل ما نقفل ... شعبولا لحد دلوقتى مطلعش علينا بأغنية عن غزة مع انو مبيفوتش سبوبة زى كدة فى العادة علا المانع خير ..... وهييييييييية .... يلا خلصنا ... اقعدوا بالعافية .

No comments: