Thursday, January 22, 2009

مين فينا عاقل ومين مجنون ؟؟


  • تصريحات حكومية : المواطن هدفنا !!!

  • بنقول للشباب اللى ماشى لابس البنطلونات اللى واقعة

Low Waist

والبنات اللى ماشية من غير هدوم فى الشارع فى محاولة لتقليد الغرب فى فرق كبير بين الحضارة والدعارة

  • قرار مجلس الامن بخصوص الحرب على غزة بأختصار ... شيك بدون رصيد

  • بعد الكمية اللامتناهية من المشاعر النبيلة والاحساسيس المرهفة اللى بتتحفنا بيها الفنانة "يسرا" فى كل مسلسل رمضانى مرة بتقاوم الرشوة وبتعرق عشان تربى ولادها ومرة بتعمل مش عارف اية فى مستشفى ومرة نصيرة الغلابة والمقهورين ، اعتقد المسلسل بتاع رمضان اللى جاى بالفكاكة كدة هتكون قصتة عن سيدة فى متوسط العمر سافرت البوسنة والهرسك علشان تحمى الاطفال هناك من شم الكولة وانهم ميمشوش حافيين من غير شبشب !!!

  • احسن حاجة فى الفضائيات غير الكلام الكبير بتاع خلت العالم قرية صغيرة والخبر اللى فى المكسيك تعرفوا بعد دقيقة من حدوثه انى بقالى تقريبا اكتر من 7 سنين مقلبتش على القناة والاولى والتانية ... احمدك يارررررب

  • مشكلة العرب فى التعامل مع الحرب على غزة انهم أتصرفوا كأنهم ميعرفوش ولما عرفوا متصرفوش ولما اتصرفوا معملوش .. دى ياجماعة اسمها المعادلة البتنجانية فى الرياضيات المهلبية

  • الماس الكهربائى السبب الرئيسى فى حريق مجلس الشورى وحريق الاوبرا وحريق القاهرة بتاع الثورة وخرم الاوزون وفوز اوباما وهزيمة النادى الاهلى فى اليابان ... سونة اجدع ناس !!!

No comments: